Poeta en acción A palabra poética habita o papel mais tamén pode habitar outros espazos: unha boca, unha praza, unha ollada infantil, un tanque. A partir desta visión xorden proxectos e pezas de poesía en acción atravesadas pola linguaxe escénica e audiovisual, ás veces baseadas nos poemarios da autora (Nenæspiraes, Corpo de Antiochia, Irmá paxaro, Bosque vermello), ás veces creadas de xeito expreso para certas temáticas ou ocasións. Xunto a Marcos Viso alumou o proxecto 'Cartas ás 12', onde ilustración e escrita establecen un diálogo sen fronteiras nin xerarquías. Del naceron o sobre viaxeiro Bicos, laranxas e un feixe de pensamentos e mais o álbum Distancias. Traduce, revisa, ensina, escribe sobre poesía e teatro, imparte obradoiros poéticos e de animación á lectura e coordina eventos literarios (ciclo de recitais 'Teñamos a poesía en Paz', ciclo de vermús literarios 'Un ronsel de historias', festival poético 'Fala o mar').